Qafarak sugeét Boód Figdah Maknayal yan Gexe-kalittee kee Fooci-qaagoh Goranto: Awsaay, Kiblat kee Gabbi Rasittek Doorimte Daqoorit Cubbit Haak
Main Article Content
Abstract
Maxmaama
A fokkaaqok amolladi hadaf Qafarak Sugeet Bood Figdah Maknayal yan Gex-kalittee kee Fooci-qaago Gorrisaanam. Fokkaaqo edde xooqaysimtem weelisso fokkaaqoh aykabab kinnuk, yengele gurrat, axcih ixximalee kee maxxatle gurrat inkih xooqaysimte. Fokkaaqo muunatah beyte mari ittat 270 yakkeh yan waqdi, muunatisyyi cogdah sahlin amok-rada muunatisyya. Oyti gaaboysiyyah edde yintifiqqem mabla garayaay, hangimte butta agaaradaay, kee esser-cibta. Qafar ayyunti bood edde yafdige issi sugeet bood figdah maknay leemiiy, wuxih fan edde xooqaysimaanam kee faxe qaynatih bood edde yafdigeenim tet kinnim 100% takke raddi taco diggosse. Qafar ummatta kaadu doolat mackamat xisoosak, Qafarak sugeet mackamah rakissoh laftaanam kee, QSBFM kaxxam sahliniih, sissikiih, awqenta dagooh, qadliinooy, qidiino kee gabat agle le gexsit kinni ayyunti booluk bool elle yaaminem kusaq geeh. QSBFM duma luk suge libdoo kee gexsit saytunaane cabak geytimaamaay, magaalol kee barri caddol xooqaysimiyyaa kee gexso baxsi awayih uddur dagoom kaal tammullem a kusaq diggoysa. Qafarak Sugeet Bood Figdah Maknayal lafale gex-kalitte Ayyuntiinok-qidaddooy, magaaliyyo baarimiyyaay, baadiinoo kee doolat gaba cusla kinnim akusaaqak lafale geyto. QSBFM fooci-qaago tascasse lafa-lafale caagitak baadal SBFM bood figdah issikkeh doori digraamih mamaxxaga gemiiy, Itiyoppiyah caddol sugeet ixxigah yecen mamaxxagga, baxsaluk qaada madqah madable madqa rakisso akah fissaanamih macalitte tanim kee Qafár Rakaakay makaabon malah buxa xisaamih ekraaro gactemiiy tonna Qafar ayyunti teetih le konnabnaa kee oggol kinniimi. Amogexaak QSBFM elle sugennal gexe wayuh mango adafitte taniih, baye wayuk kaadu mngo saamitte lem kusaq xalot yascasse. QSBFM sarrimaane xooqayso yaalluh adder der kusaaq abak nagay tan sanadisso abaanam kee horaak-horal akah tabanna kulli maglableela taamitam faxximtaah, tonnaah madqaak tan mamaxxaga akah acayuk abinisa dagara gablusaanam faxximta.
Lafale qangor: Qafarre, Qafarak Sugeet Bood Figdah Maknay, Gex-kalittee, Fooc-qaago